У школ

Кристина, Настя, Наташа, Элина у школ нергенат шоныде да нунын

Сардаялыште икымше школым 1884 ийыште почмо. Тудо кок классан лийын. Йоча-влакым лудаш-возаш марла туныктеныт. Варарак руш йылме да моло предмет-влак ешаралтыныт. Тудын кызытсе зданийжым 1917 ий деч ончыч кӱртньыгорно вокзаллан чоҥымо. Шоҥгыеҥ-влакын ойлымышт почеш Дружино ял гоч Арск-Уржум кӱртньыгорно шуйнышаш улмаш. Но революцийлан кöра тудо шукталтде кодын. Тыге 1960 ий тӱҥалтыште вокзаллан чоҥымо пурам Сардаялыш шупшыктеныт, школыш савыреныт. Кызыт йоча-влак тыште 9 класс марте тунемыт.

Школна кызытат пашам ышта.Тудо мыланна келша – мотор, моло вере нигушто тыгай уке. Но йӱран годым леваш гыч вӱд чыпча, мардежан годым йӱштö. Занятийлан прибор-влак, библиотекыште книга-влак огыт сите, спортзалыште йӱштö, вер шагал. А эн тӱҥжö, школнам петырат гын, ялнат пыта. Тиде мемнам чот тургыжландара.

Ме 9-ше классыште тунемше Ермолаева Юлианна деч интервьюм нална да «У школышто тунеммет шуэш мо?» - манын йодна. Юлианна тыге вашештыш:

«Тиде пешак сай лиеш ыле! Илыш дене тöр каяш кӱлеш. У школ лиеш гын, кызытсе гай йӱштö ок лий ыле. У школ дене пырля у йöн-влак лектыт. Тудыже, конешне, куандара.» Тудо школым тунем пытара гынат, шке ялжын ончыкылыкшо верч тургыжлана.